अनेरास्ववियु बाँकेद्वारा जिल्ला स्तरीय वक्तृत्वकला प्रतियोगिता सम्पन्न

कोहलपुर, बाँके।
अखिल नेपाल राष्ट्रिय स्वतन्त्र विद्यार्थी युनियन अनेरास्ववियु जिल्ला कमिटी बाँकेको आयोजनामा राष्ट्रियता र लोकतन्त्र विषयक जिल्ला स्तरीय खुला वक्तृत्वकला प्रतियोगिता सम्पन्न भएको छ।्
युवापुस्तामा राष्ट्रियता र लोकतन्त्रप्रति चेतना अभिवृद्धि गर्ने तथा वैचारिक बहसको सशक्त मञ्च प्रदान गर्ने उद्देश्यले आयोजना गरिएको उक्त प्रतियोगितामा २५ वर्षमुनिका विद्यार्थीहरूको उत्साहजनक सहभागिता रहेको थियो। प्रतियोगितामा १ सय १५ जनाभन्दा बढी सहभागीहरूले नाम दर्ता गराएका थिए।
कार्यक्रमका प्रमुख अतिथि नेकपा एमालेका केन्द्रीय सदस्य तथा बाँके क्षेत्र नम्बर १ का प्रतिनिधि सभा सदस्य पदका उम्मेदवार सूर्य ढकालले विजेता तथा सहभागीहरूलाई प्रमाणपत्रसहित सम्मान गरेका थिए।
सो अवसरमा बोल्दै नेता ढकालले युवापुस्ताको सक्रियता, वैचारिक स्पष्टता र राष्ट्रप्रतिको जिम्मेवारीबोधले मात्रै देशको भविष्य सुदृढ बन्ने बताएका थिए। उनले लोकतन्त्रको सुदृढीकरणका लागि सचेत, अध्ययनशील र राष्ट्रप्रेमी युवाको आवश्यकता औंल्याउँदै यस्ता कार्यक्रमले युवामा नेतृत्व क्षमता विकास गर्ने विश्वास व्यक्त गरे।
प्रतियोगितामा महेश्वर उपाध्याय प्रथम हुन सफल भए भने इशानी शर्मा दोस्रो र नवीन खत्री तेस्रो स्थान हासिल गर्न सफल भए। त्यसैगरी मिसन थारु चौथो, आकृति फुयाल पाँचौँ, आकृति सिंह ठकुरी छैटौँ तथा खिमा पौडेल सातौँ स्थानमा रहे।
प्रतियोगितामा प्रथम हुनेले नगद रु १० हजार, दोस्रोले रु ६ हजार, तेस्रोले रु ५ हजार, चौथोले रु ४ हजार, पाँचौँले रु ३ हजार तथा छैटौँ हुनेले रु २ हजार पुरस्कार प्राप्त गरे। साथै सहभागी सबैलाई नगद रु २५० सहित प्रमाणपत्र प्रदान गरिएको आयोजकले जनाएको छ।
वक्तृत्वकलामा हरी तिमिल्सिना, ज्ञानेन्द्र शाही, पुष्कर रिजाल, चिरञ्जीवी सुवेदी, सारदा प्रसाद कोइराला, सागर गैरे तथा अन्जु खड्कासहितको निर्णायक मण्डल रहेको थियो।